Ég, svo oft sem áður kíkti í snyrtivörudeildina í Hagkaup því mig vantaði sólarvörn. Sólarvörnin sem ég átti var ekki að henta í andlit og þar sem ég er með ofurviðkvæma húð í andliti þá fann ég fyrir óþægindum þegar ég setti hana á mig. Þrátt fyrir að þessi sólarvörn sem ég átti hafi sérstaklega verið gerð fyrir börn og viðkvæma húð þá fékk ég engu að síður ofnæmisviðbrögð í framan, þannig ég ákvað að finna mér nýja, sérstaklega gerða fyrir andlit.

Ég var einnig búin að ákveða að ég skyldi kaupa mér góða sólavörn, frá góðu merki og eyða þannig aðeins meiri pening í hana en það sem þessar ódýru sólarvarnir kosta. Ég fann að sjálfsögðu hina fínustu sólarvörn og að þessu sinni ákvað ég að kaupa sólarvörn sem hentar fyrir alla fjölskylduna frá Clarins með SPF 50, trúið mér ég er rosaleg með þetta, ég er rosalega hrædd við skaðsemi sólarinnar. Ég hef brunnið illa og það er eitt það versta sem ég hef upplifað.

En tilgangurinn með færslunni er samt annar, enn átti ég eftir að finna vörn fyrir andlitið þegar ég sá þetta vatnshelda BB krem frá Shiseido með sólarvörn 50+. Ég verð að viðurkenna að ég varð óþæginlega mikið spennt fyrir þessu kremi. Eins og ég sagði hér fyrr þá er ég með mjög viðkvæma húð, ég brenn mjög auðveldlega og háræðar í kinnum liggja mjög grunnt þannig ég er með frekar ójafnan húðlit og maður minn!! Þetta krem jafnaði húðlitinn og gaf húðinni rosalega fallega og glóandi  áferð, það hylur vel án þess að gefa svona “meik áferð”. Kremið er þunnt auðvelt að bera það á, það er gert sérstaklega fyrir andlit, með góðri sólarvörn og er vatnshelt þannig að það hentar einstaklega vel í sund og á ströndina. Það kemur í þremur tónum, ég valdi medium en það hentaði best mínum húðtón. Mig langar líka að benda á þá staðreynd að maður tekur alveg lit þó að maður noti sterka sólarvörn eini munurinn er að þú brennur ekki og skaðlegir geislar sólar ná ekki að valda varanlegum húðskemmdum og þannig minnkar þú líkur á sortuæxli.

En ég skellti mér allavega í sund með nýja kremið, brann ekkert og var svona líka fín með fallega og glóandi húð.

Þetta BB krem keypti ég í Hagkaup í Skeifunni og það kostaði 4.399,-

Auður Eva Ásberg

Eins og fyrr hefur komið fram bauð ég mínum heittelskaða eiginmanni í óvissuferð um norðurlandið nú á dögunum. Eitt af því skemmtilegasta sem við gerðum í þessari ferð var að fara í hvalaskoðun með North sailing eða Norðursiglingu á Húsavík. Við mættum þangað í blíðskaparverðri á laugardeginum og þar sem ég er alin upp í litlu sjávarþorpi til níu ára aldurs er ég ekki óvön því að það syndi af og til hvalir inn í fjörðinn. Því var þessi ferð svona meira hugsuð fyrir manninn minn til að sjá og njóta en sú varð síðan alls ekki raunin. Ég naut hennar engu  síður en hann en hér kemur ferðasagan okkar.

Við áttum bókaða ferð með Norðursiglingu eins og fyrr segir og lögðum af stað frá bryggju kl 13:30, ferðin tók í allt þrjá klukkutíma. Um borð var boðið uppá hlýja kraftgalla svo enginn þurfti að kvarta undan kulda en hitastigið út á sjó er alveg töluvert lægra en í landi. Við vorum ekki búin að sigla lengi þegar við rákumst á hóp höfrunga sem syntu í kringum bátinn hjá okkur líkt og þeir væru hoppandi glaðir því mikill asi var á þeim. Svo var ferðinni haldið áfram lengra út á haf því sést hafði til hnúfubaks.

Þegar nær dró, slökkti skipstjórinn á vélinni á bátnum og dauðaþögn ríkti um borð. Ég er alveg viss um að það mátti heyra saumnál detta svo mikil var þögnin. Hópur af fólki stóð sem styttur í bátnum og starði á hafið bíðandi eftir að hvalurinn kæmi upp til að anda. Svo allt í einu birtist þessi stóra tignarlega skepna og var svo nálægt að manni leið næstum eins og hægt væri að snerta hana.

Maður heyrði klárlega andrardrátt hans og svo synti hvalurinn undir bátinn. Svona gekk þetta nokkrum sinnum, hann kom upp dró andann og hvarf síðan ofan í hafdjúpið. Ef ég ætti að lýsa mómentinu betur þá leið mér næstum því eins og ég væri á magnþrunginni spennumynd í bíó svo mikil var eftirvæntingin eftir að hann kæmi upp aftur. Aftur var haldið af stað og nú sást til hrefnu lengra frá og það var sama sagan, skipstjórinn drap á vélinni, og eftirvæntingin var sú sama þegar hann lét sjá sig. Magnaðar skepnur alveg hreint, stórar tignarlegar og gaman að sjá með berum augum. Um borð voru nokkrir starfsmenn Norðursiglingar, auk skipstjórans, sem klifruðu upp í möstrin með kíki til að finna hvalina á miðunum í kring. Einn þessara starfsmanna var fararstjóri sem fór yfir öryggisatriðin í bátnum og fræddi farþegana um hvalategundirnar sem við gætum séð og umhverfi Húsavíkur sem var mjög áhugavert. Hann tók einnig skýrt fram að við værum ekki komin í dýragarð, hvalirnir kæmu ekki eftir pöntun en í flestum tilfellum sjást hvalir í þessum ferðum, enda hafa þeir unnið við hvalaskoðanir í fjölda mörg ár og vita hvar á að leita.

Mér fannst sjóferðin sem slík mjög skemmtileg, yndislegt veður, sólin skein og það var léttur andvari þó svo að komið sé fram í miðjan október. Hreina íslenska loftið fyllti lungun af súrefni. Útsýnið út á hafið og til nærliggjandi eyja var ofsalega fallegt. Við vorum svo sannarlega í okkar eigin heimi og oft leið mér eins og við værum bara tvö á þessum báti því maður gleymdi sér svo auðveldlega í þessum fallegu aðstæðum.

Á heimleiðinni var boðið uppá heitt súkkulaði og kanilsnúð sem var svo sannarlega kærkomið eftir alla útiveruna. Ég mæli sannarlega með því að fara í hvalaskoðun með Norðursiglingu á Húsavík. Það tekur ekki nema klukkutíma að keyra til Húsavíkur frá Akureyri og hægt er að fá gistingu, á Húsavík eða við Mývatn, bæði á hótelum og bændagistingu fyrir þá sem vilja kannski staldra við og skoða meira. Svo er skemmtilegt hvalasafn á Húsavík sem við reyndar kíktum ekki á í þetta sinn. Stutt er að keyra á Mývatn frá Húsavík þannig að hægt er að slá tvær flugur í einu höggi og enda hvalaskoðunarferð á heimsókn í Jarðböðin á Mývatni eins og við gerðum. Það tekur ekki nema um 40 mínútur að keyra frá Húsavík yfir á Mývatn, 58 kílómetrar. Jarðböðunum svipar til Bláa lónsins en í þeim er heitt kísilvatn sem kemur úr jörðinni. Baðaðstaðan er til fyrirmyndar og útsýnið úr lóninu er yfir Mývatnið. Við vorum þarna snemma kvölds og horfðum á sólina setjast við vatnið og nutum þess síðan að horfa á stjörnubjartan himininn. Það er svo margt skemmtilegt hægt er að sjá og upplifa sem landið okkar hefur uppá að bjóða og ég hlakka til að upplifa meira af því í hlutverki ferðamanns. Ég vona svo sannarlega að ég geti miðlað sem flestu til ykkar.