by Mamman | 15.11.2016 | Uppskriftir
Það er alveg nóg að gera hjá fólki allan ársins hring. Við þurfum ekkert endilega að vera að flækja hlutina og elda eitthvað flókið og gourmet á hverjum einasta degi. Því er upplagt að elda súpur við og við. Ég fékk þessa hugmynd frá Dagnýju vinkonu minni í Danmörku en hún er alltaf með súpu í matinn einu sinni í viku sem hún kallar súpu-miðvikudaga. Sumum finnst kannski ekki súpur vera matur en, suss segi ég, þær eru bara víst matur ekki síst ef þær eru gerðar frá grunni. Súpur geta verið mjög matarmikilar og stútfullar af hollustu. Súpugerð þarf ekki að vera flókin og ein af mínum uppáhaldssúpum er einmitt mjög einföld og smakkast sjúklega vel.
Uppskrift
- 1 stór púrrulaukur (ljósi hlutinn)
- 25 g smjörlíki
- 1,5 l vatn
- 2-3 súputeningar (ég nota tvo kjúklinga- og einn grænmetis-)
- 1 dós Philadelphia rjómaostur
Byrjið á að hreinsa púrrulaukinn vel. Skerið hann svo í þunnar sneiðar og steikið í potti þar til laukurinn er orðinn mjúkur og heimilið farið að ilma yndislega (án djóks lyktin er guðdómleg). Bætið þá vatninu og súputeningunum út í og látið suðuna koma upp og endið á að setja rjómaostinn út í og látið svo malla í ca 15 mín.
Berið fram með góðu nýbökuðu brauði og eggjum. Klikkar ekki!
Þessi uppskrift dugar í tvær máltíðir fyrir mína fjölskyldu (6 manns) en afganginum helli ég í rennilásapoka og frysti og nota seinna. Það er svo gott að eiga góða súpu í frystinum til þess að hita upp ef maður hefur lítinn tíma.
Bon apetit!
Karlotta Jónsdóttir
by Mamman | 3.10.2016 | Uppskriftir
Poppskálin frá Lékué sem seld er í Dúka er algjör snilld sem ég kynntist um daginn. Ég hef verið að hreinsa til í mataræði mínu og hef því reynt að hafa fæðuna sem hreinasta og umfram allt þá vil ég vita hvað ég er að setja ofan í mig. Ég elska popp og hef í gegnum tíðina verið stór styrktaraðili framleiðenda örbylgjupopps sem er kannski ekki það hollasta sem til er og eins getur verið erfitt að átta sig á innhaldsefnunum í því. Ég hef hreinlega verið löt við að poppa mér sjálf popp í potti og ef ég hef brett upp ermarnar og gert slíka tilraun þá hef ég yfirleitt brennt poppið við og endað á því að þurfa að loftræsa íbúðina og henda viðbrenndu poppinu í ruslið. Þess vegna varð ég svo glöð þegar ég uppgvötvaði þessa snilldarpoppskál frá Lékué sem er úr platínum silikoni. Það eru mælieiningar í botninum sem sýna magnið af poppmaísnum og svo þarf smáklípu af smjöri eða olíu, ég t.d nota yfirleitt kókosolíu á mitt popp því hún gefur svo góðan keim, hendi svo skálinni inní örbylgjuofn í 2-3 mínútur og voila, hollt og gott popp tilbúið án aukaefna!
Eins er hægt að prófa alls konar útfærslur af poppi. Mér finnst æði að setja Herbamare kryddblöndu yfir. Í henni er hafsalt með kryddjurtum þannig að hún er einstaklega góð með poppi. En hér ætla ég að láta fylgja eina uppskrift af poppi með karrí.
Bollywoodpopp
- poppmaís + olía eða smjör
- 20 g smjör
- Tæplega 1 tsk karrí
- 15 gr kókosmjöl stráð yfir
Poppaðu eina skál af poppi með Lékué skálinni þinni. Bræddu smjörið og blandaðu karríinu saman við. Þegar poppið er tilbúið hellir þú karríblöndunni og kókósmjölinu yfir poppið og þá er karrípoppið tilbúið. Njótið!
Þessi færsla er ekki kostuð.
by Mamman | 31.08.2016 | Næring & heilsa, Uppskriftir
Flestar nýbakaðar mæður kannast við stressið sem getur fylgt brjóstagjöf og velta fyrir sér hvað sé til ráða ef mjólkurframleiðslan er ekki næg. Sjálf er ég nýbökuð móðir með stórt heimili hefur mjólkurframleiðslan ekki verið sem skyldi. Eftir að hafa prufað ýmis gömul húsráð ákvað ég að leita að ráðum hjá Google. Þar fann ég geggjaða uppskrift af smákökum sem áttu að auka brjóstamjólkurframleiðsluna og ótrúlegt en satt þá flæddi mjólkin hjá mér nokkrum klukkustundum síðar. Það tók ekki nema um 15 mínútur að skella í kökurnar og um 10 mínútur að baka þær.
- 100 gr smjör (við stofuhita)
- 1 bolli hveiti
- ½ bolli púðursykur
- 1 ½ bolli haframjöl
- 1 egg
- 1 tsk lyftiduft
- 2 tsk möluð hörfræ (ekkert mál að mala í t.d. matvinnsluvél)
- 2-3 tsk vatn
- 1 tsk vanilludropar
- 1 tsk kanill
- ½ tsk gróft salt
- 1-2 tsk brewers yeast
Bakað við 180°í 8-10 mín.
Brewers yeast er fæðubótarefni frá t.d. NOW, en það er ekki til hér á landi (allaveganna hef ég ekki fundið það) og varð ég að sleppa því úr uppskriftinni. Samkvæmt innihaldslýsingu NOW þá er þetta tegund af geri sem er framleitt úr ákveðnu byggi sem er notað í t.d. bjórframleiðslu. Gerið hefur náttúruleg prótein ásamt B-vítamínum. Ráðlagt er að taka tvær msk daglega í mjólk eða safa. Einnig er hægt að bæta því í matreiðslu eða bakstur til að auka þar með næringargildi.
Til þess að gera kökurnar ennþá betri þá má bæta við t.d. súkkulaði, rúsínum eða einhverju öðru með. Ég bætti við sirka einum dl. af kókosmjöl og um 100 gr af þurrkuðum trönuberjum.
Kökurnar voru æðislegar og slógu í gegn hjá öllum heimilismeðlimum.
Ég mæli með því að bera þær fram með ískaldri mjólk.
Njótið!
Elsa Kristinsdóttir
by Mamman | 25.08.2016 | Næring & heilsa, Uppskriftir
Tinna Arnardóttir starfar sem hóptímakennari og einkaþjálfari hjá World Class í Egilshöll. Síðan 2009 hefur hún verið með námskeiðið Nýr lífstíll og er það eitt það vinsælasta hjá World Class. Við spjölluðum við Tinnu og fengum nánari útskýringar á námskeiðinu hjá henni og eina uppskrift.
Tinna Arnardóttir
Nýr lífstíll er námskeið fyrir konur sem þurfa að missa 15 kg eða meira. Það verður vinsælla með hverju árinu sem líður og fyllist alltaf strax. Ég hef það að sjónarmiði að nr.1, 2 og 3 sé að konur hafi gaman af því að hreyfa sig og komi hreyfingunni inn í rútínuna sína. Mataræðið er svo smám saman tekið með án þess að það séu einhverjir öfgar því tengdir.
Í því þjóðfélagi sem við búum í dag er oft lítill tími til að standa í eldamennsku og sumum finnst hreinlega ekkert gaman að elda þ.m.t. ég. Því einbeiti ég mér að einföldum uppskriftum sem eru ekki með milljón hráefni og taka helst ekki lengri tíma en 30-40 mín en eru næringagóðar og hollar.
Ef það eru einhverjar spurningar varðandi námskeiðið þá er velkomið að senda mér tölvupóst á tinna@worldclass.is – Einnig er hægt að fylgjast með á instagram tinna_funworkout
Eitt það besta sem ég og dætur mínar fá í hádegis- eða kvöldmat þessa dagana er eggjatortilla. Það tekur ca 15 mín að útbúa hana frá grunni.
Fyrir 1
- 1 heilveititortilla
- 2 eggjahvítur og 1 eggjarauða
- ½ lítið avocado
- 1 msk salsasósa
- 1 msk saxaður rauðlaukur
- Lime
- guacamolikrydd
Eggin eru þeytt saman og steikt á pönnu, ég steiki báðar hliðar. Tortillan er svo hituð yfir eggjunum eftir að þeim er snúið til að fá hana mjúka. Salsa smurt á, eggin sett ofaná og tortiunni rúllað upp. Borið fram með heimagerðu guacamole.
–
Guacamole
- ½ lítið avacado stappað
- 1 msk smátt saxaður rauðaukur
- guacamolikrydd eftir smekk
- smá lime kreist yfir
–
Njótið!
by Mamman | 16.08.2016 | Uppskriftir
Aðalheiður Ýr Ólafsdóttir, alltaf kölluð Heiða, starfar sem einkaþjálfari í World Class Laugum. Heiða er einnig með síðuna www.heidiola.is en þar er að finna skemmtilegan fróðleik og uppskriftir sem tengjast góðu og heilsusamlegu líferni. Við hjá mömmunni fengum Heiðu til að gefa okkur uppskrift af girnilegum og hollum haframúffum sem hægt er að skipta út fyrir hafragrautinn á morgnana og smyrja með íslensku smjöri eða jafnvel sykurlausu Nutella á tyllidögum.
“Þessar múffur eru mjög einfaldar og hægt er að nota í þær það sem manni dettur í hug. Grunnurinn er haframjöl, egg og bananar og svo er hægt að leika sér með hitt. Hér er ein af mörgum útfærslum,” segir Heiða
- 4 bollar haframjöl (hægt að nota glúteinlausa hafra frá Urtekram, fæst m.a. í Hagkaup, Krónunni, Nettó og Samkaup)
- 2 bananar (betra að þeir séu þroskaðir)
- 4 egg
- 1 kúfuð msk grísk jógúrt (má nota hreina jógúrt eða súrmjólk)
- 1 dl kókosmjöl (má sleppa)
- 5 dropar kókos stevia dropar (má sleppa)
- 1 msk sukrin sykur eða stevia sykur (má sleppa)
- 1 tsk vínsteinslyftiduft
- smá klípa af maldon salti mulið yfir
Öllu er hrært saman í eina skál með sleif. Setjið svo ca tvær matskeiðar í hvert muffinsform og bakið í 20 mín við 200°C.
“Ég var í bústað með fjölsyldunni um helgina og bakaði eftir þessari uppskrift nema ég bætti í hana döðlum og sykurlausu súkkulaði til að gera múffurnar aðeins meira spari. Hér kemur það sem ég bætti við:
- 1 dl skornar döðlur, ég klippti þær með eldhússkærum sem er mun fljótlegra.
- 1 plata Balace dökkt súkkulði með stevia.
- 1 banani sem ég skar niður og notaði sem skraut ofan á.
Auður Eva Auðunsdóttir
by Mamman | 16.07.2016 | Uppskriftir
Lax er ekki bara hollur heldur er fátt sem mér finnst betra en ferskur bakaður lax.
Hægt er að kaupa ferskan lax bæði í fiskverslunum og mörgum matvöruverslunum. Sumir kunna að meta frosinn lax en ég vel að kaupa hann ferskan því mér finnst hann bara miklu betri þannig. Þessi uppskrift miðar við að laxinn sé ekki marineraður á nokkurn hátt heldur sé hann bakaður í ofni en það er ekkert því til fyrirstöðu að skella honum á grillið í staðinn.
Sinnepsgljáður lax
Uppskrift:
- 1 kíló ferskur lax
- 2 msk gróft sinnep
- 1 hvítlauksgeiri
- safi úr ½ sítrónu
- salt og pipar eftir smekk
Aðferð:
Hitið ofninn í 200 gráður.
Leggið laxinn á bökunarplötu ofan á smjörpappír.
Kryddið laxinn með salti og pipar og látið bakast í 10 mín.
Á meðan laxinn er að bakast blandið þá saman sinnepinu, hvítlauknum og sítrónusafanum í skál og þegar hann hefur bakast í 10 mín penslið þá gljáann á (notið allan gljáann) og bakið áfram í 5 mín eða þar til laxinn er eldaður í gegn.
Blómkálsgratín
Uppskrift:
- 1 blómkálshaus
- 4 msk smjör
- 4 msk hveiti
- 2 tsk Sinneps duft
- 2 bollar mjólk
- 1 ¼ bolli og 2 msk Cheddar ostur
- salt og pipar eftir smekk en einnig er hægt að nota cayenne pipar
Aðferð:
Skerið blómkáls blómin af stilknum og sjóðið í 6-7 mínútur. (Líka hægt að setja í örbylgjuofninn í u.þ.b 8 mín.) Kreistið svo mesta vatnið úr blómkálinu með því að leggja það á þurrt viskustykki og vinda vatnið úr. Setjið blómkálið svo í eldfast mót.
Notið miðlungsstóran pott og bræðið smörið og bætið svo við hveitinu og búið til smjörbollu. Bætið þá við sinnepsduftinu og piparnum. Þynnið svo varlega út með mjólkinni og passið að ekki myndist kekkir. Saltið eftir smekk og látið svo malla þar til sósan er orðin nægilega þykk að ykkar mati. Bætið þá við 1 ¼ bolla af cheddar osti og leyfið honum að bráðna. Smakkið og bætið við salti og pipar eftir þörfum.
Hellið svo sósunni yfir blómkálið og setjið 2 msk af rifnum cheddar yfir og bakið í ofni í u.þ.b. 30-35 mín á 200 gráðum.
Þegar gratínið er tilbúið (osturinn orðinn gullinn) þá er gratínið stappað með gaffli þar til það er farið að líkjast mús. Einnig má skella þessu í blandarann.
Berið svo fram með laxinum og fersku salati.
Bon apetit!
Karlotta Ósk Jónsdóttir
